Kryeministri i Kosovës, Albin Kurti ka deklaruar se nuk do të ketë marrëveshje përfundimtare me shtetin e Serbisë nëse pengohet Kosova të bëhet anëtar i Organizatës së Kombeve të Bashkuara, transmeton Gazeta Sinjali.
Kurti deklaron se në dialogun Kosovë-Serbi synojnë normalizimin e marrëdhënieve ndërmjet dy shteteve. Ai është shprehur se Serbia duhet ta njohë shtetin e Kosovës në marrëveshjen përfundimtare, ku edhe duhet të inkuadrohet edhe ulësja në OKB.
“Marrëveshja përfundimtare dhe ligjërisht obliguese, për neve është ajo që nuk e ndan njohjen nga ulësja në OKB. Marrëveshja është ligjërisht e obligueshme atëherë kur ajo e ka formën dhe përmbajtjen e një marrëveshje ndërkombëtare sipas kërkesave dhe qëllimeve të konventës së Vjenës për ligjin mbi traktatet”, ka thënë Kurti në mbledhjen e Këshillit të Përgjithshëm të Lëvizjes Vetëvendosje.