Duket se interesimi për blerjen e patundshmërive, viteve të fundit, referuar Bankës së Shqipërisë dhe Dhomës së Tregtisë, është shtuar për zonat e jugut, transmeton albinfo.ch.
Vlen të theksohet se blerësit kryesorë, sipas raportit të tyre, janë diaspora e Kosovës në Zvicër e Gjermani, por edhe shtetas të Republikës së Kosovës.
Sipas raportit, krahas qytetarëve nga Kosova, për pronat e zonës së Vlorës janë të interesuar edhe rusët e ukrainasit, ndërsa në Sarandë interesim të shtuar kanë shtetasit e Serbisë.
Nga të gjitha vendet, Lungomare në Vlorë mbetet zona më e preferuar për investitor të jashtëm. Çmimet e apartamenteve në Lungomare thuajse janë trefishuar dhe janë bërë të papërballueshme për banorët vendas, por jo edhe për të huajt. Nga 500-600 euro për metër katror në Lungomare sa ka qenë më parë, tani ka arritur në 1500 euro/m2, por edhe 2000 euro/m2, por kjo, sipas të dhënave zyrtare, nuk e ka ulur fuqinë blerëse.
Kryetari i Dhomës së Tregtisë në Vlorë, Arben Breshani, ka thënë:
“Janë emigrantët, kryesisht kosovarët e Zvicrës e Gjermanisë, por edhe rusët dhe ukrainasit ata që po blejnë shtëpi të reja në bregdetin e Vlorës”, ka thënë Breshani.
“Zona më e kërkuar është ajo e Lungomares. Kërkesa nga vendi s’ka shumë, shumica janë nga emigrantët dhe shtetasit e huaj. Kosovarët e Zvicrës dhe Gjermanisë, por ka edhe shtetas të huaj, ukrainasit dhe rusët, po hulumtojmë blerje banesash. Oferta në qytet është shumë e madhe, ndaj duhet të jepen më shumë leje ndërtimi për njësi banimi dhe hoteleri”, ka bërë të ditur më tej Breshani.