Lëvizja Vetëvendosje e ka thyer traditën e deritashme të formimit të institucioneve. Për herë të parë në historinë parlamentare kryetari dhe nënkryetarët janë zgjedhur pa marrëveshje paraprake politike. Me zgjedhjen e Glauk Konjufcës kryetar i Kuvendit dhe nënkryetarëve të tjerë është shmangur bllokada institucionale dhe ka marrë rrugë formimi i Qeverisë, edhe pse nuk ka marrëveshje politike mes një shumice parlamentare.
Lidhja Demokratike ka mbetur e befasuar dhe e ka quajtur të njëanshëm veprimin e Vetëvendosjes.
Megjithatë, të gjithë 28 deputetët e kësaj partie votuan për kandidatin e propozuar. Por për LDK-në të gjitha dakordimet e deritashme me VV-në bien në ujë.
Por pretendenti për kryeministër, Albin Kurti, ka thënë se zgjedhja e Konjufcës nuk ishte befasi, por një qytetari demokratike për të mos shkaktuar bllokadë institucionale.
Me gjithë çarjet, LDK-ja dhe LVV-ja nuk i kanë çuar duart nga koalicioni për bashkëqeverisje.
Pas konstituimit të Kuvendit kanë nisur të rrjedhin afatet kushtetuese për votimin e Qeverisë.
Tani është në dorën e presidentit që ta nominojë kandidatin për kryeministër, i cili pastaj ka 15 ditë afat ta paraqesë për votim kabinetin në Kuvend.
Thaçi e ka përshëndetur konstituimin e Kuvendit, por nuk ka treguar kur do ta mandatojë Kurtin për kryeministër, shkruan sot Koha Ditore.
“Befasia” me zgjedhjen e Konjufcës
Gati tre muaj pas mbajtjes së zgjedhjeve të jashtëzakonshme parlamentare, deputetët e zgjedhur të legjislaturës së shtatë e kanë dhënë betimin.
Të parët që kanë zënë ulëset dhjetë minuta para orarit të caktuar kanë qenë deputetët e Lidhjes Demokratike.
Pas tyre kanë ardhur bashkërisht deputetët e partisë fituese të zgjedhjeve të 8 tetorit- Lëvizjes Vetëvendosje.
Kandidati për kryeministër i ka përshëndetur me radhë të gjithë deputetët e LDK-së të ulur në rreshtin e parë.
E deputetja e PDK-së, Ganimete Musliu, dhe ajo e AAK-së, Time Kadrijaj, ua kanë vendosur në bankën e parë të deputetëve të Lëvizjes Vetëvendosje nga një flamur kombëtar.
Një i tillë veçse ishte vendosur nga VV-ja.