Kryeministri në largim, Ramush Haradinaj, ka konfirmuar se me të dërguarin e posaçëm të SHBA’së për dialogun Kosovë-Serbi, Richard Grenell, nuk kanë diskutuar për marrëveshjet e fundit, për linjën ajrore dhe atë hekurudhore.
Dje pas homazheve te Obilisku i Hebrenjve në Prishtinë, Kryeministri në detyrë u deklarua edhe rreth marrëveshjeve të fundit me Serbinë, për të cila tha se nuk ka qenë në dijeni.
Haradinaj konfirmoi se me Grenell nuk kanë biseduar rreth linjave ajrore e hekurdhore, ndërsa thekson se për të, kjo nuk do të thotë rifillim i dialogut.
“Nuk ka qenë pjesë e diskutimit pjesa e dytë, unë kam deklaru atë që e kam deklaru”, ka thënë shkurt kryeministri në largim.
Sipas tij, impementimi i kësaj marrëveshje do të marrë kohë, pasi që hekurudhat në Kosovë, veçanërisht ato që lidhin me Serbinë, janë në gjendje të mjerueshme.
“Ne kemi hekurudhat që lidhen me Serbinë janë në gjendje të mjerume, jemi në proces të renovimit, është një projekt i madh me BE-në, një marrëveshje me Serbinë nuk i bën asnjë dëm Kosovës, janë qindra mijëra njerëz tanë që janë detyru me ra në Serbi, disa prej tyre tani e kanë alternativë edhe aeroplanin”, tha Haradinaj.
Në fund, ai shtoi se oferta nuk është e mirëfilltë tani për tani, teksa shton se kjo fazë nuk është e drejtë që të definohet si rinisje e dialogut, shkruan Gazeta Metro.
“S’kam të drejtë me e definu si dialog, fakti që po ndodhin disa marrëveshje, e mirëpresim, kemi kërku edhe më herët një dialog pa kushte, pa u heqë taksa”, ka deklaruar Kryeministri në detyrë.
Kujtojmë se javën që lam pas në Berlin me ndërmjetësim të ambasadorit amerikan Richard Grenell u nënshkrua marrëveshja për të hapur linjën ajrore Kosovë-Serbi pas 21 vitesh.
Ndërsa dje u diskutua edhe për një marrëveshje të ngjashme, hapjen e linjën hekurdhore. Për këtë çështje, delegacioni nga Kosova ishte i përbërë nga Xhemë Veseli, drejtor i Transportit Rrugor dhe Ramë Qupeva, drejtor i Infrastrukturës Rrugor.
Kurse Serbia sipas raportimeve të mediave serbe u përfaqësua nga drejtori i të ashtuquajturës Zyre Serbe për Kosovën, Marko Djuric.