Kryetari i Komunës së Mitrovicës së Jugut, Agim Bahtiri, ka thënë se në asnjë rast nuk ka bërë thirrje për vëllavrasje.
“Në asnjë kontekst nuk kam bërë thirrje për vëllavrasje. Është e turpshme të thuhet ashtu. Nuk kam thirrur për vëllavrasje. Unë kam krijuar paqe në Mitrovicë dhe gjithkund ku kam shkuar. Gjithmonë kam ftuar për paqe. Jam i paqes”, ka thënë Bahtiri për Klan Kosova përmes telefonit.
“Kam kërkuar nga Presidenti t’i shpallë zgjedhjet e lira. Është një mllef i madh i qytetarët për rrëzimin e Qeverisë në këtë kohë. Kam frikë mos ka përplasje nga qytetarët, atyre iu është vrarë shpresa. Kjo ka qenë Qeveria e shpresës”.
Bahtiri ka thënë se përmes deklaratës së tij të dhënë më herët gjatë ditës po tentohet të përfitohet.
“Është e turpshme që disa njerëz mendojnë të përfitojnë nga kjo deklaratë. Asnjëherë nuk e dëshiroj vëllavrasjen. Unë jam për të bashkuar qytetarët dhe të kemi ujdi mes njëri-tjetrit. Për këtë është Agim Bahtiri”.