Deputeti i Lëvizjes Vetëvendosje, Fitim Uka, thotë se sipas një ankete, rreth 50% e profesionistëve mjekësorë po presin tashmë të largohen për në Gjermani.
“Sipas një ankete të realizuar nga Sindikata e infermierëve, mamive dhe profesionistëve tjerë shëndetesor, rreth 50% e këtyre profesionistëve kanë aplikuar për vizë pune dhe janë në procedurë për të shkuar në Gjermani. Vitin tjetër, mund të ndjejmë mungesën e tyre”, shkruan Uka në një postim në Facebook.
Ndër të tjera, deputeti i LVV-së ka thënë se punëtorët shëndetësorë, të cilët në kohën e pandemisë u shpallën heronjë, po vazhdojnë të rrezikojnë shëndetin e tyre për çdo ditë me paga shumë të ulëta dhe demotivuese.
Ai thotë se ata, për më tepër, në ndërrimet e natës marrin vetëm 18 euro për 12 orë pune dhe nuk paguhen për angazhimin e tyre në fundjavë, edhe pse, sipas tij, me ligj parashihet një gjë e tillë.
Uka bën thirrje që të veprohet sa nuk është bërë vonë siç thotë ai, “të mos iu hyjmë në hak heronjve tanë”.