Deputeti i Kuvendit të Serbisë nga klubi i deputetëve “Lugina e Bashkuar- SDA” Shaip Kamberi, mbetet i vendosur në qëndrimin e tij se “Serbia gjendet në fazën e luftës propaganduese” ndaj regjionit sikur që ishte në vitet 90-të të shekullit të shkuar dhe se “Serbia kinse promovon Ballkanin e hapur e në fakt promovon botën serbe”.
Këtë deklaratë, ai e bëri në Forumin e 14-të për drejtësi tranzicionale që po mbahet në Beograd, ku shtoi se është e pasinqertë nga Serbia e cila kinse angazhohet dhe promovon “Ballkanin e hapur” e në të njëjtën kohë promovon “idenë e Serbisë së Madhe” përkatësisht kamuflimin në botën serbe.
“Kjo dëmton stabilitetin dhe demokracinë në regjion dhe kjo na sjell në situatën e konflikteve të reja. Thelbi i pengesave në procesin e pajtimit është vetë Serbia”, tha Kamberi.
Sipas tij, Serbia ka probleme e konteste me Kroacinë “duke mos dëshiruar të pranojë krimet e luftës sepse me siguri iu frikësohet reparacioneve të luftës”.
Kamberi nënvizoi se “Serbia nuk dëshiron të pranojë krimet në Bosnje” sepse vlerësoi se “dëshiron të rrëmbejë Republika Srpska”.
“Serbia nuk dëshiron të pranojë as krimet e luftës të kryera në Kosovë, sepse mendon se në atë mënyrë do të ruajë më mirë pozitat në procesin aktual të dialogut”, u shpreh Kamberi.
Ai vlerësoi se në Serbi në skenë aktualisht është “revizionizmi historik”, që “barazon çetnikët edhe lëvizjen lotiçevce me antifashistët nga Lufta e Dytë Botërore”.
Kamberi mendon se problem shtesë në të gjithë këtë situatë është se BE po humb fuqinë nxitëse drejtuese, sepse “nuk ka potencial për zgjerimin e mëtejmë”.
Këto deklarata të Kamberit kanë hasur në reagime të shumta kryesisht nga deputet edhe njerëz të pushtetit, që kanë kritikuar Kamberin për qasjen e tij rreth situatës aktuale në Serbi.