Afati ligjor deri kur i mundësohet Prishtinës që të zgjedhë kryesinë e Kuvendit është 6 janari. Në rast se një gjë e tillë nuk ndodh, kryeqyteti mund të shkojë në zgjedhje për asamble komunale.
Kështu e përcakton Ligji për Vetëqeverisje Lokale, sipas të cilit “kryesuesi i Kuvendit duhet të zgjidhet më së largu 30 ditë pas betimit të anëtarëve të asamblesë”. Rrjedhimisht i bie që, me 6 janar, përfundon afati ligjor për konstituimin e Kuvendit Komunal, shkruan lajmi.net.
Pavarësisht se ka numrin më të madh të asamblistëve, Lëvizja Vetëvendosje ka hequr dorë nga pozita e kryesuesit të Kuvendit Komunal.
Asamblisti nga kjo parti Gëzim Sveçla deklaroi se zgjedhja e kryesuesit është përgjegjësi e Përparim Ramës.
“Është detyrë, përgjegjësi dhe obligim i kryetarit të sapo zgjedhur dhe partisë së tij LDK, që ta bëjnë konstituimin e asamblesë dhe rrjedhimisht është në duar të tyre që ta zgjedhin kryesuesin e Kuvendit”, deklaroi për RTV Dukagjinin Sveçla.
Ende nuk dihet se kush është propozuar për këtë pozitë, meqë as LDK-ja e as PDK-ja nuk janë deklaruar karshi kësaj çështjeje.
LDK-së i nevojiten edhe të paktën 12 vota nga subjektet e tjera politike në Asamble për të zgjedhur kryesuesin e Kuvendit.
Publike mbetët vetëm ftesa që iu është bërë Arben Vitisë për udhëheqjen e Drejtorisë së Shëndetësisë, për çka Rama i LDK-së ende nuk ka marrë përgjigje.
Deri më tani është bërë publik vetëm emri i nënkryetarit Alban Zogaj dhe shefit të kabinetit, Vllaznim Osmani.