Anëtari serb i presidencës boshnjake, Milorad Dodik, e ka quajtur provokim telegramin e urimit për pavarësinë e Kosovës nga anëtari tjetër i presidencës boshnjake, Zeljko Komshiq.
Dodik e ka quajtur anëtarin kroat të presidencës si anëtar i rrejshëm që ka uruar një shtet të rrejshëm.
“Urime për një shtet të rrejshëm nga një anëtar i rrejshëm i presidencës, me gënjeshtrën që ka vepruar në emër të Bosnje e Hercegovinës. Një mashtrues dhe manipulues i vogël, ai s’mund të bëjë ndryshe përveçse të provokojë. Komshiq shfaqi dje arritjet e tij sa i përket jetesës së bashku në Bosnje e Hercegovinë”, tha Dodik.
Sipas Dodik, Komshiqit s’i intereson për Kosovën por qëllimi i tij është t’i provokojë serbët.
“Kjo është politika e tij pasi ai u braktis në zgjedhje si një kroat i rrejshëm”, tha ai.
Anëtari kroat i presidencës boshnjake, Zeljko Komshiq, ka uruar dje presidenten e Kosovës Vjosa Osmani për nder të 14 vjetorit të pavarësisë.