Ministrja e Punëve të Jashtme në Qeverinë e Kosovës, Donika Gërvalla ka njoftuar sonte në orët e vona, se ka mbajtur takimin e parë me grupin ndërinstitucional të punës për integrimin e Kosovës në Aleancën Veri-Atlantike, NATO.
Gërvalla, në një njoftim në Twitter, ka thënë se pas sulmeve të Presidentit të Rusisë, Vladimir Putin në Ukrainë, Evropës i duhet një strategji e re sigurie.
“Sonte kryesova takimin e parë të grupit punues, i themeluar nga Qeveria për të rritur përpjekjet për anëtarësim në NATO. Pas sulmeve të Putinit, epoka e re në Evropë ka nevojë për një strategji të re për garantimin e paqes në kontinentin tonë”, ka thënë Gërvalla.
Tonight, I’ve chaired the first meeting of the working group, established by the🇽🇰 government to increase our efforts for @NATO membership.
After Putin’s attack, the new era in #Europe requires a new strategy for securing peace in our continent. pic.twitter.com/SMEVmMUVIp
— Donika Gërvalla-Schwarz (@gervallaschwarz) March 9, 2022
Qeveria e Kosovës ka vendosur sot për themelimin e Grupit ndërinstitucional të punës për integrimin e Kosovës në NATO.
“Objektivat kryesore të këtij grupi do të jenë avancimi i procesit të integrimit në NATO, përfshirja sa më e shpejtë e Kosovës në Partneritetin për paqe, anëtarësimi në Kartën e Adriatikut A 5, fuqizimi i pranisë së Kosovës në mekanizmat tjerë dhe intensifikimi i bashkëpunimit me aleatët strategjik ndërkombëtar”, ka thënë sot kryeministri i Kosovës, Albin Kurti.
Aspiratat e Kosovës për anëtarësim në Aleancën Veri-Atlantike, janë rritur që nga nisja e përpjekjeve për pushtimin e Ukrainës nga ana e Rusisë. Liderët institucionalë të vendit, disa herë, kanë theksuar se Kosova mund të rrezikohet nga ambiciet territoriale serbe, nëse konflikti në Ukrainë përshkallëzohet.