Ngritja e pa kontrolluar çmimeve në nivel vendi ka bërë që shumë qytetarë dhe figura publike të reagojnë për këtë gjendje, njëri ndër ta edhe analisti Imer Mushkolaj, i cili në mënyrë hipotetike ka ironizuar me kryeministrin Kurti.
“Veç nuk osht Albin Kurti n’pushtet, se ndryshe ish konë gjendja”, shkroi Mushkolaj në rrjetin social Facebook.
Kryeministri Kurti sot dha një “version” tjetër sidomos për çmimin e vajit, pasi që mediat raportuan për një anomali të tillë.
“Po të ishte çmimi 3 euro e gjysmë do të thoshin që ndoshta edhe është e rastësishme, por ishte 3.49 cent. Anembanë marketeve në Kosovë po na njoftojnë qytetarët e Republikës, konsumatorët përmes fotografive të rafteve, çmimi identik 3.49 euro. 3.50 ndoshta do të ishte e rastësishmen por nuk është e rastësishme kjo përputhje anembanë Kosovës”, tha ai
Kurti deklaroi se nuk ka asnjë arsye që të rritet kështu çmimi i vajit.
“Është një fryrje artificiale në dëm të konsumatorëve të Kosovës. Nuk ka kurrfarë arsye, nevoje, për një fryrje të tillë”, tha kryeministri.
Ngritja e çmimeve në shumë artikuj ushqimorë ka nxitur reagime në opinion.
Së fundi reagime të shumta ka ngjallur shtrenjtimi enorm i vajit ushqimor, ku nga 1.60 sa ka qenë ditëve të fundit sot është raportuar se çmimi ka shkuar deri në 3.50 euro.