Patriarku Ekumenik Bartolomeu I, udhëheqësi shpirtëror i të krishterëve ortodoksë lindorë në mbarë botën, e ka denoncuar pushtimin e Ukrainës si një akt “mizor” që po shkakton vuajtje të mëdha gjatë një vizite që pati në Varshavë.
Edhe pse ai nuk e denoncoi Rusinë me emër, ai tha se “është thjesht e pamundur të imagjinohet se sa shkatërrim ka shkaktuar ky pushtim mizor për popullin ukrainas dhe mbarë botën”, në një konferencë shtypi.
Ai shtoi se solidariteti me ukrainasit “është e vetmja gjë që mund të kapërcejë të keqen dhe errësirën në botë”, shkruan The Guardian.
Bartolomeu u takua gjithashtu me kryepeshkopin Stanisaw Gdecki, kreun e Konferencës së Peshkopëve Polakë, i cili, sipas Associated Press, shkoi më tej, duke thënë se pushtimi i Rusisë ka rezultuar në vdekjen e “mijëra njerëzve të pafajshëm duke përfshirë qindra fëmijë, të moshuar, gra dhe burra që nuk kishin asnjë lidhje me konfliktin”.
“Shumë nga veprimet e agresorit mbajnë shenjat dalluese të gjenocidit”, tha Gdecki.
Por, kreu i Kishës Ortodokse Ruse, Patriarku Kirill, ka mbrojtur sulmin ndaj Ukrainës, duke shkruar në një letër më 10 mars se konflikti s’ka filluar tani.
“Ky konflikt nuk filloi sot. Unë besoj fuqishëm se nismëtarët e tij nuk janë popujt e Rusisë dhe Ukrainës, të cilët janë të së njëjtës vatër pagëzimi Kievan, janë të njëjtë nga besimi i përbashkët, shenjtorët dhe lutjet e përbashkëta dhe kanë fatin e përbashkët historik. Origjina e konfrontimit qëndron në marrëdhëniet midis Perëndimit dhe Rusisë”.