Festa e Sulltan Nevruzit, dita e parë e pranverës dhe ditëlindja e Alija bin Ebi Talibit, është festa më e madhe e dervishëve në Kosovë dhe ka një rëndësi të veçantë për ta, shkruan sot gazeta kroate Veçernji List.
Nuk festohet vetëm fundi i dimrit dhe ardhja e pranverës, por shënohet edhe fillimi i një epoke të re shpirtërore.
Dervishët e Kosovës, si ata në mbarë botën, e kanë mbajtur festën e tyre tradicionale të pranverës në Rahovec, shkruan Vecernji List.
Fillimi i pranverës është një festë e veçantë për komunitetin dervish në Kosovë, të cilën e shënojnë duke u mbledhur dhe festuar në një objekt fetar të quajtur teqe. Siç dihet, shumica dërrmuese e popullsisë në Kosovë është myslimane, por vetëm disa mijëra i përmbahen ligjeve fetare dervishe. Mësimet e tyre janë përcjellë brez pas brezi që nga koha e Perandorisë Osmane, vijon shkrimi i gazetës kroate.
Një rol të spikatur në sufizëm e luan shehu (imami), pra mësuesi, i cili është edhe kreu i dervishëve të mbledhur në teqe.
