Shtrimi i Michael Schumacherit në spitalin Georges Pimpidou në Paris për t’iu nënshtruar një terapie me bazë qelizat staminale ka tërhequr vëmendjen e opinionit publik mbi shëndetin e legjendës së Formula 1.
Familja e ish-shoferit gjerman vazhdon të jetë shumë e kujdesshme në ruajtjen e privatësisë që nga viti 2013, kur legjenda pësoi aksidentin në alpet franceze.
- Advertisement -
Nga “Le Parisien” vjen një lajm që shton shpresat për riaftësimin e Schumit: “Është në zonën time, mund t’ju siguroj se është i vetëdijshëm,” mësohet të jetë shprehur një punonjës i spitalit.
Dëshmitari në fjalë, zbulon e përditshmja franceze, duhet të punojë në repartin ku është shtruar Schumacheri, të cilin e ka vizituar miku i tij i vjetër, Jean Todt.
Terapia e ndjekur nga doktori i famshëm Philippe Menasché, kardiokirurg, duhet të përfundojë sot, që do të thotë se Schumacheri, i shtruar në këtë spital me emër të rremë, duhet të kthehet në vilën e tij në Zvicër.