Kryetarja e Kuvendit, Vjosa Osmani ka folur edhe për mundësinë e përfshirjes së Rusisë në dialogun Kosovë- Serbi.
Sipas saj, Rusia është një vend që synim e ka destabilizimin e rajonit, raporton Gazeta Blic.
“As Serbia e as Rusia nuk kanë synim stabilizimin e rajonit, por përkundrazi destabilizimin”, tha ajo, duke shtuar se kësisoj, Rusia nuk bën të jetë pjesë e këtyre negociatave.
Ajo tha se i vjen keq që Serbia edhe më tutje “trupin e ka në Evropë, por mendjen e ka në Rusi”.
Osmani është pyetur nëse do të jetë kryetare e Kuvendit, nëse do të formohet qeveria e re LDK- AAK- Nisma.
Ajo ka theksuar se “nuk mund të paragjykoj pa dalë vendimi i Gjykatës Kushtetuese. Dhe pastaj të shohim hapat tjera, dhe do të veprojmë”.
Sipas saj, tani për tani jemi në një situatë hipotetike, dhe çkado që komentoj, i bie që po e paragjykoj vendimin e Gjykatës Kushtetuese.“Pasi të dalë vendimi, atëherë do të përgjigjem në pyetjen tuaj”, tha Osmani.