“Kosova, me sa di unë, qysh në bisedimet e Vjenës ka kërkuar dhe insistuar që kompensimi i dëmeve të luftës të futen në kuadër të bisedimeve me Serbinë. Duket që ka pasur një hezitim apo refuzim nga ana e faktorit ndërkombëtar, por edhe Kosova zyrtare nuk ka bërë shumë në këtë drejtim. Tash është koha e fundit që ky gabim i yni të korrigjohet dhe të insistohet me çdo kusht që shteti serb të pranoj realitetin duke paguar dëmet që i ka shkaktuar Kosovës”, tha Quni për “Kosova Sot Online”.
Fillimi i bisedimeve të reja me Serbinë për normalizim të marrëdhënieve dhe njohje reciproke, do të jenë një nga detyrat parësore për qeverinë e re të Kosovës në rrafshin diplomatik, kërkesë kjo që ka filluar të artikulohet gjithnjë e më shpesh edhe nga faktori ndërkombëtar, shtetet me ndikim që mbështetën Kosovën dhe ndihmuan forcimin e sovranitetit ndërkombëtar pas shpalljes së pavarësisë, para 12 vitesh.
Mirëpo këto bisedime, që do të jenë një barrë serioze për qeverinë në ardhje, nuk do të kishin kuptimin dhe efektin real të normalizimit të plotë të raporteve me Serbinë , nëse ky shtet nuk e pranon kërkesën për kompensimin e dëmeve të luftës.
Kështu ka thënë për “Kosova Sot Online”, anëtari i kryesisë së LDK-së, Anton Quni, i cili njëherësh është edhe deputet i Kuvendit të Kosovës, i rizgjedhur përsëri edhe në mandatin në vijim.
“Mendoj që është qenësore, që Serbia t’i paguaj dëmet e luftës Kosovës, është një hap konkret dhe i sigurt për arritjen e paqes mes nesh dhe në gjithë rajonin. Duke paguar dëmet e luftës, shteti serb do të bënte shkëputjen nga regjimi kriminal i Millosheviqit, pra do ta ndihmonte edhe Serbinë që të fillonte një epokë të re të ekzistimit të saj”, tha Anton Quni për “Kosova Sot Online”.
Sipas Qunit, çështja e dëmeve të luftës me Serbinë,m nuk është temë krejtësisht e harruar nga institucionet e shteti tonë, pasi që në fillim të bisedimeve të Vjenës është provuar të futet në agjendë, por është refuzuar nga faktori ndërkombëtar.
“Kosova, me sa di unë, qysh në bisedimet e Vjenës ka kërkuar dhe insistuar që kompensimi i dëmeve të luftës të futen në kuadër të bisedimeve me Serbinë. Duket që ka pasur një hezitim apo refuzim nga ana e faktorit ndërkombëtar, por edhe Kosova zyrtare nuk ka bërë shumë në këtë drejtim. Tash është koha e fundit që ky gabim i yni të korrigjohet dhe të insistohet me çdo kusht që shteti serb të pranoj realitetin, duke paguar dëmet që i ka shkaktuar Kosovës”, tha Anton Quni për “Kosova Sot Online”.
Rreth kësaj çështje, “Kosova Sot Online” i ka dërguar pyetje edhe subjektit politik Vetëvendosje, që pritet ta drejtojë qeverinë e re të Kosovës me kryeministër Albin Kurtin, por nga ky subjekt politik nuk kanë kthyer ndonjë përgjigje rreth kësaj teme.