E ashtuquajtura Zyrë për Kosovën në qeverinë serbe ka demantuar deklarimet e MPJ-së së Kosovës se i është ndaluar hyrja në Serbi ministres së Jashtme, njëherësh zëvendëskryeministres së Kosovës, Donika Gërvalla Schwarz.
Siç raportojnë mediat në Serbi, kjo zyrë ka thënë se janë absolutisht të pasakta pretendimet e disa portaleve shqiptare dhe zyrtarëve të Prishtinës se Beogradi nuk e ka lejuar vizitën e sotme të ministres Donika Gërvalla Schwarz në Bujanoc dhe Preshevë.
“Sipas marrëveshjes për vizitat zyrtare, çdo vizitë ndërmjet zyrtarëve të Beogradit dhe Prishtinës konsiderohet e miratuar nëse nuk ndalohet shprehimisht me shkresë, kështu që kërkesa e Donika Gërvalla Schwarzit është trajtuar pozitivisht. Gjithashtu, zyrtari ndërlidhës që përfaqëson Beogradin i tha gojarisht kolegut të tij – zyrtarit ndërlidhës të Prishtinës në Beograd – sot se vizita e Gërvalla Schwarzit në Serbinë qendrore është miratuar dhe se ajo mund të vizitojë komunat e përmendura në përputhje me marrëveshjen e vlefshme dhe pa shenja statusi”, thuhet në deklaratën e kësaj zyre.
Më tej e njëjta thotë se për këtë dëshmon edhe e-maili me të cilin zyrtari ndërlidhës i Prishtinës falënderoi sot zyrtarin ndërlidhës të Beogradit me rastin e aprovimit të vizitës, por që të njëjtin email kjo Zyrë nuk e ka publikuar.
“Prandaj u bëjmë thirrje mediave dhe zyrtarëve në Prishtinë që të mos mashtrojnë opinionin dhe të paraqesin informacione të pasakta. Beogradi është ai që vazhdimisht i respekton marrëveshjet dhe angazhohet për normalizimin e marrëdhënieve dhe asnjë akuzë e gabuar nga Prishtina nuk mund ta prishin këtë”, thuhet në deklaratën e kësaj zyre, sipas “Danasit”.
Në një deklarim gjatë ditës për “Zërin”, nga MPJ-ja thanë se ministrja e Jashtme e Kosovës, Donika Gërvalla Schwarz, nuk është lejuar të hyjë në Serbi në lidhje me vizitën e paralajmëruar për sot në Kosovën Lindore.
“Ne kemi kërkuar leje. Vizita ka dështuar për shkak të lojërave të pandershme të Beogradit. Vizitën do të përpiqemi megjithatë ta realizojmë në një datë tjetër”, kanë thënë nga MPJ-ja.