Albin Kurti, lideri VV’së njihet si një nga personat anti-rugovë, por jo edhe njerëzit përreth tij, si Haki Abazi që para një viti kishte deklaruar se pa presidentin Rugova, s’do të ishte gjallë Kosova, shkruan Gazeta Metro.
Me datën 2 dhjetor të vitit 2018, Abazi kishte shkruar për Ibrahim Rugova, presidentin historik të Kosovës, se është meritori për shtetin e Kosovës.
“Po të mos kishte lindur Rugova, vështirë që sot do të ishte Kosova”, shkruan kandidati nga Ferizaj.
Për Abazin, ashtu si për fanatikët më të mëdhenj të LDK’së, del se Ibrahim Rugova ishte në fakt ati themeltar i Republikës së Kosovës.
Mirëpo, Kurti as pas presioneve të mëdha publike që ta vizitonte varrin e të ndjerit, nuk e ka bërë një gjë të tillë. Madje, këtë e ka arsyetuar në formë qesharake me fjalët “po më thonë vizitoje, prandaj nuk do ta vizitoj.”
Por, qëndrimi i Abazit që në këto zgjedhje mban numrin 8 në listën e VV’së, është i pashembullt në partinë e tij.
Abazi ndryshe njihet për afërsinë e madhe me Lidhjen Demokratike të Kosovës, dhe para se të anëtarësohej në VV ai kishte diskutuar gjatë për mundësinë e anëtarësimit në këtë parti.
Nuk dihet se si do ta pres një gjë të tillë elektorati i Vetëvendosjes, pjesa më e madhe e të cilëve, kanë të njëjtin qëndrim si lideri i tyre në lidhje me figurën e Rugovës./