Akademiku Rexhep Qosja, është aktivizuar ditëve të fundit me deklarime publike.

Ai, në faqen zyrtare në Facebok, nga 25 marsi e deri sot, 30 mars, ka publikuar katër shkrime të ndryshme, me përmbajtje kritike e deklarata thumbuese për liderët politikë në Shqipëri e Kosovë.

Me 25 mars, Qosja, i njohur për afërsinë me dy kryeministrat shqiptarë, Edi Rama dhe Albin Kurti, sulmoi Sali Berishën, duke e kritikuar që në moshë aq të vjetër biologjike përpiqet ta “tollovis” Shqipërinë e Kosovën.

“Megjithëse në moshën kur moshanikët e tij (Sali Berishës) enden korridoreve të spitaleve me fashikuj në duar plot diagnoza e dokumente të tjera mjekësore, ai po i bën këto beteja politike dhe që gati një vit po i tollovit shqiptarët në Shqipëri e Kosovë”, kishte shkruar Qosja, në një shkrim relativisht të gjatë.

Ai e kritikoi Berishën për përpjekjet e tij për të marrë drejtimin e PD-së si dhe për ta rrëzuar Edi Ramën nga pushteti. Kryeministrin shqiptar e shfajësoi, duke thënë se ai nuk impakt në krizat e fundit të çmimeve, për të cilat në Shqipëri janë mbajtur edhe protesta masive.

Me 26 mars, pra të nesërmen, Qosja bën një postim të ri, ku flet për Ditën e Pavarësisë, 17 shkurtin, një muaj e 9 ditë më vonë. Ai kritikoi opozitën, e cila kishte lëshuar seancën ceremoniale të pavarësisë, pasi që Kurti kishte nisur të fliste për sukseset e qeverisë së tij.

“Por, kur gjatë këtij diskutimi përimtues tha disa fjalë edhe për politikën e Qeverisë kryeministër i së cilës është, deputetët e Opozitës, që kanë shumë qejf ta kritikojnë e sulmojnë Qeverinë, kur me arsye e më shpesh pa arsye, u çuan dhe e lëshuan mbledhjen solemne! Po, po, e lëshuan mbledhjen solemne!”, shkroi i çuditur Qosja.

Me 27 mars, akademiku e kritiku i njohur letrar, publikoi një tjetër reagim. Këtë herë, Ai i reagoi Ben Blushit për deklaratën e tij të vjetër se “Kosova është koloni kulturore e Shqipërisë”. Reagimi i tij erdhi 6 vjet pas deklaratës së Blushit, por megjithatë erdhi. Pa ia përmendur emrin, Qosja tha se Blushi vuan nga “atdhetarizmi i mëhallës” dhe “atdhetarizmi i rrejshëm”.

“Dhe kështu lufta e tij me shkrim e me gojë kundër politikës së imagjinuar koloniale kulturore të Shqipërisë ndaj Kosovës është dhe do të mbetet jo vetëm mendim i gabuar e veçues, por edhe veprim kundërkombëtar shkrimor e gojor: veprim kundër vetvetes”, shkroi Qosja në reagimin e 27 marsit.

Me 28 dhe 29 mars, Qosja pushoi. Nuk publikoi asnjë reagim.

Sot, 30 mars, ai u mor me Presidenten e Kosovës, Vjosa Osmani, të cilën e kritikoi për qasjen e saj që atdhe të vetëm e sheh Kosovën, dhe jo Shqipërinë. Ai bëri edhe një shpjegim të fjalës “Atdhe”.

“Pse e thotë dhe e rithotë tash, pa ia kërkuar kush, se Kosova është i vetmi Atdhe i yni? A nuk është më e drejtë, më e drejtë dhe më e arsyeshme shkencërisht dhe etnikisht dhe historikisht të thuhet sot se Kosova, Kosova e Shqipëria janë Atdheu i ynë, janë dy Atdhetë tanë? Po, po, padyshim: Po.

Ata që thonë se Kosova është i vetmi Atdhe i yni janë, për fat, në numër shumë e shumë më pak sesa ata që e thonë, që e mendojnë dhe që e ndiejnë, se Kosova dhe Shqipëria janë Atdheu ynë. Dhe do të jenë Atdheu ynë, i pëlqeu a nuk i pëlqeu pakicës së papërfillshme, edhe kur gjendet në karrige të përfillshme”, shkroi sot Qosja.

Pesë ditë pasi e kritikoi Sali Berishën për përpjekje që të “tollovis” Kosovën e Shqipërinë në moshë të shtyrë, Qosja, në moshë më të shtyrë se Berisha, lansoi disa sulme brenda pesë ditëve.

Pyetja legjitime është: Mos po provon edhe Qosja që të shkaktojë ndonjë tollovi si Sali Berisha, të cilin e kritikoi?