Banorët e bjeshkëve të Kullës së Zhlepit, kanë filluar të kenë punë me policinë malazeze. Këta të fundit ndaj banorëve shqiptar po kryejnë bastisje. Kjo gjë po i shqetëson banorët e kësaj zone, të cilët po thonë se për të njëjtat stane tatim të pronës paguajnë në Pejë. Të njëjtit po kërkojnë ndihmë nga Qeveria e Kosovës. Banorët e bjeshkëve të Kullës së Zhlepit po thonë se policia malazeze ka filluar t’i largojë ata nga kjo zonë
Kjo tabelë tregon që prej kësaj pjesë fillon territori i shtetit të Malit të Zi e përfundon ai i Republikës së Kosovës.
Por në praktikë në bjeshkët e Kullës së Zhlepit po ndodh e kundërta.
Këto bjeshkë duket se janë marrë nën kontroll nga policia malazeze.
Madje sipas banorëve, tash e dy javë ka filluar edhe dëbimi nga e njëjta polici.
Këta të fundit, po ashtu penguan edhe ekipin e T7-tës, ta kryejë punën e tij.
Përfaqësuesi i banorëve, Sadri Zekaj thotë që banorët e bjeshkëve të Strellcit, Llukës, Radavcit e Jabllanicës nuk po i lejojnë të dalin andej pa u lajmëruar, meqë sipas autoriteteve atje kjo pjesë është territor i Malit të Zi.
Zekaj thekson që banorët këtu tatimin e paguajnë në Pejë, për këtë ekzistojnë edhe dokumentet.
Ndërkohë ish kryetari i Pejës, e përfaqësuesi i banorëve të Rugovës, Ali Lajçi thotë që ka filluar zbatueshmëria e ratifikimit të marrëveshjes me Malin e Zi.
Sipas tij, policia malazeze është ma rigoroze teksa thekson që po tentohet të vendoset territori në administrim të plotë.
Mirëpo sipas banorëve, aksione të bastisjes nga ana e policisë së Malit të Zi ka pasur edhe më herët.
Televizoni ka tentuar të marrë një qëndrim për këtë çështje edhe nga qeveria, por e njëjta nuk është përgjigjur.
Kuvendi i Kosovës pati miratuar demarkacionin me Malin e Zi marsin e vitit 2018.
E votimi i kësaj marrëveshje për dy vite u ndalua në kuvend përmes tymit të gazitlotsjellës.