Osmani: Urime Dita e Evropës nga populli më i izoluar në Evropë
Kryeparlamentarja e Kosovës Vjosa Osmani, ka uruar Ditën e Evropës, duke thënë se Kosova orientim të qartë strategjik e ka anëtarësimin në Bashkimin Evropian.
Por, ajo ka thënë se mbajtja e popullit më pro-evropian, popullit të Kosovës, të izoluar është në kundërshtim me vlerat e BE-së.
Osmani në urimin e saj ka prekur edhe temën e ndryshimit të kufijve, duke deklaruar se çdo skenar për këtë, është poashtu në kundërshtim me vlerat e BE-së.
Kryeparlamentarja ka porositur që në BE të punohet për paqe, stabilitet e solidaritet e bashkim kundër atyre që promovojnë urrejtje, ndarje e diskriminim.
Urimi i plotë i Vjosa Osmanit:
Urime Dita e Evropës nga populli më i izoluar në Evropë
Sot në ditën e Evropës rikthejmë në kujtesë edhe një herë se sa e rëndësishme dhe produktive është paqja mes popujve e shteteve dhe orientimi drejt një të ardhmeje të përbashkët evropiane.
Duke promovuar fillimisht bashkëpunimin tregtar e pastaj edhe diversitetin kulturor e etnik, Bashkimi Evropian u shndërrua në projektin që jetësoi zhvillimin ekonomik, krijoi mirëqenie për qytetarin dhe u shndërrua në entitetin që u bë sinonim i paqes dhe i stabilitetit në botë. Andaj, Kosova orientim të qartë strategjik e ka anëtarësimin në Bashkimin Evropian.
Jetësimi i vlerave që i ka mishëruar Bashkimi Evropian në themelet e tij janë sot po aq të rëndësishme sikurse edhe 70 vjet më parë.
Por, mbajtja e popullit më pro-evropian, popullit të Kosovës, të izoluar është në kundërshtim me po këto vlera.
Çdo skenar i pranuar për ndryshim kufijsh të vendeve që aspirojnë integrimin në BE është poashtu në kundërshtim me këto vlera.
Shpresojmë që sot, 70 vite pas, e përherë në BE të mbizotërojnë mendjet e ndritura, sikurse ajo e Robert Schuman dhe të punohet për paqe, stabilitet e solidaritet e të bashkohemi kundër atyre që promovojnë urrejtje, ndarje e diskriminim.