Albin Kurti e ka trazuar Serbinë, me dy letra që i shkroi javën e fundit.
Me gjasë, këto veprime të tij bënë që Aleksandar Vuçiq të thërrasë në një takim urgjent krerët e Kishës Ortodokse.
Kjo mbledhi e tij me patrikun Porfirije dhe peshkopët e KOS-it u bë sot në Beograd, raportojnë mediet e këtushme, e përcjellë Klankosova.tv.
Në takimin, që u shoqërua me drekë në Presidencën e Serbisë, u ftua edhe lideri i serbëve të Bosnjës, Milorad Dodik, një veprim ky deridiku i pazakonshëm për këto ngjarje. Ky dhe Vuçiq u panë duke puthur duart e liderëve fetarë të Kishës Ortodokse.
Zyra e numrit një të Serbisë ka konfirmuar se në këtë takim u fol për çështjet më të rëndësishme për serbët e Kosovës, situatën në siç u tha “Kosovë e Metohi” dhe për tema tjera.
Takimi ndodh një ditë pasi kryeministri i Kosovës, Albin Kurti, i dërgoi një ftesë priftit kryesor të Manastirit të Deçanit, atit Sava, të cilit ia bëri me dije se është i gatshëm ta vizitojë në këtë tempull fetar dhe të bisedojë me të në lidhje me këtë dhe objektet e tjera të trashëgimisë kulturore e fetare në Kosovë.
Javën e kaluar, Kurti u shkroi 52 presidentëve e kryeministrave të shteteve më të forta të botës, për t’iu thënë se shteti i Kosovës dhe shoqëruar këtu është e gatshme ta mbrojë “me dashuri dhe dedikim” të gjitha faltoret dhe objektet e trashëgimisë.
“Ne jemi të përkushtuar për të mbrojtur trashëgiminë tonë kulturore, e cila është universale dhe i përket gjithë njerëzimit. Ajo i përket gjeneratave që ishin, atyre që janë dhe atyre që do të jenë”, thuhet mes tjerash në këtë letër, që e publikoi Klan Kosova, të martën.
“Qeveria e Kosovës është e përkushtuar për dialog të ndershëm e sistematik me gjithë përfaqësuesit e komuniteteve pakicë, specifikisht me ata që janë serbë, përfshirë klerin e Kishës Ortodokse serbe në Kosovë”.
Ky dokument i ishte dërguar edhe kryeministres serbe, Ana Bërnabiq, e cila në reagimin e saj ka thënë se “është tmerruar” me letrën e Kurtit, të cilën e quajti “maja e hipokrizisë dhe cinizmit”.