Kryetari i Federatës Sindikale të Shëndetësisë, Blerim Syla, sot ka folur në Komisionin për Shëndetësi rreth gjendjes së mjekëve përballë kërkesave të tyre për t’iu rritur paga me anë të Ligjit të Pagave.
Ai ka thënë se urgjentisht duhet të rregullohet çështja e punëtorëve shëndetësorë, ngase përmbushja e kërkesës për rritje prej 50 për qind të pagës do t’i “ulte gjakrat”.
“Nga pakënaqësitë që mund të vijnë në vazhdim nuk mund të jap përgjegjësi, për shkak se mund të kalojë në anarki. Mund të qetësohemi ne si federatë, por mund të ketë grupe të tjera. Në fillim të janarit duhet të ketë rritje të pagave për 50 për qind”, ka thënë ai.
Me anë të Ligjit të ri për deklarim pasurie, që do të shtynte mjekët të deklaronin pasurinë, këta të fundit janë ndier të ofenduar, sipas Sylës.
“Mjekët janë ndier të ofenduar, pasi kanë dëgjuar se tash do ta deklarojnë pasurinë. Ata e kanë gatishmërinë ta deklarojnë, por janë ndier shumë të paragjykuar”, ka thënë Syla.