Presidenti i vendit, Hashim Thaçi, tashmë ka arritur në objektin e dhomave të specializuara dhe Zyra e Prokurorit të Specializuar në Hagë.
Me të arritur në këtë vend, Thaçi është deklaruar para mediave në gjuhën angleze, ku tha se kjo ftesë është tentativë për njollosjen e luftës së UÇK-së dhe është një lloj propagande politike në momentet më kyçë, ku gjendet shteti i Kosovës në këtë fazë të dialogut me Serbinë.
Thaçi tha se do t’i përgjigjet kësaj ftese ashtu siç ka pranuar edhe më herët për të dëshmuar pafajësinë e tij dhe liderëve të tjerë të UÇK-së.
“Sot jam këtu në respekt të ëndrrës time dhe për atë që kam luftuar, një Kosovë të lirë dhe të pavarur, bazuar në të drejta të barabarta dhe në sundimin e ligjit.
Jam gati të përballem me sfidat e reja dhe të fitoj, për djalin tim, për familjen time dhe për vendin tim. Askush nuk mund ta rishkruajë historinë.
Ky është çmimi i lirisë.
Unë besoj në paqe, në të vërtetën dhe në drejtësi.
Unë besoj në dialog dhe në marrëdhënie të mira me vendet fqinje.
Kosova është një histori suksesi dhe unë jam shumë krenar.
Destinacioni i Kosovës është integrimi në Bashkimin Evropian, NATO dhe marrëdhëniet e mira me SHBA,” deklaroi Thaçi.
Thaçi edhe më herët pati deklaruar se lufta e UÇK-së ka qenë e pastër dhe se kjo gjë do të dëshmohet edhe në këtë ftesë të bërë nga Specialja.
Për të përkrahur Thaçin dhe luftën e UÇK-së para objektit të Speciales në Hagë sot janë mbledhur shumë shqiptarë, të cilët kanë brohoritur e kanë kënduar për Ushtrinë Çlirimtare të Kosovës, e ku ndër të tjera kanë deklaruar se vazhdojnë të besojnë në pafajësinë e Thaçit si edhe në luftën e denjë të UÇK-së.