Tre zyrtarë policorë janë lënduar në protestën e sotme të organizuar nga PSD-ja kundër shtrenjtimit të rrymës.
Kështu ka bërë të ditur Policia e Kosovës përmes një njoftimi për media.
“Megjithatë, disa nga pjesmarrësit kanë shpërfillur urdhërat e zyrtarëve policor, të cilët përtej hudhjes së gjësendeve të ndryshme, me veprimet dhe sjelljet e tyre u kanë shkakuar lëndime të lehta tre zyrtarëve policor që ishin në kryerje të detyrës zyrtare”, thuhet në njoftim.
PK-ja bën të ditur se aktualisht po trajton rrethanat që karakterizojnë ngjarjen, duke iniciuar edhe një hetim për rastin “Sulm ndaj personit zyrtar në kryeje të detyrës zyrtare”.
Në Kosovë sot u protestua kundër shtrenjtimit të energjisë elektrike.
Protesta e sotme nuk kaloi pa tensione në momentin kur protestuesit i janë afruar afër ndërtesës së Qeverisë së Kosovës, duke u përplasur kështu edhe me Policinë e Kosovës.
Një përplasje me policinë e Kosovës kishte edhe kreu i PSD-së, Dardan Molliqaj i cili më pas u lejua të mbajë fjalim në shkallët e ndërtesës së Qeverisë, pas tërheqjes së policisë. Në disa pamje të publikuara, Molliqaj shihet duke goditur shuplakë një nga pjesëtarët e Policisë së Kosovës.