Izraeli e ka regjistruar shifrën më të lartë të rasteve me Covid-19 që nga fillimi i pandemisë me gati 11.000 të infektuar të rinj për 24 orë. Besohet se kjo përhapje po shkaktohet nga varianti Delta.
Rekordi i mëparshëm i rasteve ishte shënuar më 18 janar të këtij viti me 10.118 raste të reja për një ditë, shkruan The Guardian, transmeton Gazeta Express.
Pavarësisht rekordit të së martës, Izraeli po e çon përpara planin për hapjen e plotë të shkollave të mërkurën, ndërsa autoritetet po mundohen që ta rrisin edhe më tej shkallën e vaksinimit.
Kryeministri i Izraelit, Naftali Bennett, i cili i kritikonte masat izoIuese që u zbatuan nga paraardhësi i tij, Benjamin Netanyahu, ka thënë se beson që përhapja e Covid19 mund të mbahet nën kontroll përmes vaksinimit dhe masave mbrojtëse si përdorimi i maskave.
Qeveria e Bennettit i ka inkurajuar të gjithë banorët mbi moshën 12-vjeçare që ta marrin dozën e tretë të vaksinës së kompanive Pfizer e BioNTech.
Rreth 60 për qind e popullsisë mbi 9-milionëshe të Izraelit i kanë marrë dy dozat e vaksinës, ndërsa kjo përqindje është 80% tek të rriturit.