Anëtari i Kryesisë së LDK’së, Skënder Hyseni, ka thënë së thirrja e seancës për formimin e Qeverisë nga lideri i VV’së, Albin Kurti, ka qenë papërgjegjësi nga ana e tij dhe tregon joseriozitet, shkruan Gazeta Metro.
Në Rubikon ai ka thënë se VV po bën veprime të njanshme, pikërisht në kohën kur po bëhen përpjekje për dakordim.
Hyseni thotë se lidhur me lajmin për seancën e ka marrë nga mediet.
“Derisa je në një proces negociues me një partner potencial, gjëja me e natyrshme do të ishte të njoftosh për vendimet. Ndërkohë që ne prisnim një përgjigje ndaj ofertës shumë gjeneroze të LDK-së ne pame një fizkulture të radhës së LVV-së. Ka një tendencë në qarqe të caktuara në Vetëvendosje që LDK-në ta marrin me mos përfillje, që LDK-në ta marrin me tallje. Me një partner potencial nuk komunikohet përmes video mesazheve, me në partner potencial komunikohet në mënyrë të drejtpërdrejtë”, ka thënë ai.
Ai tutje ka shtuar se insistimi i LDK-së ka qenë që të mos ketë koalicion parazgjedhor, por se pas zgjedhjeve, partneri i vetëm potencial ka qenë Vetëvendosje.
“VV-ja bënë me gisht gjithnjë edhe nëse vepron mirë edhe keq, prandaj nuk e marrë seriozisht. VV-ja nuk është e gatshme të marrë përgjegjësitë. VV-ja që nga certifikimi i zgjedhjeve është sjellë si një fushatë parazgjedhore dhe çdo veprim ka qenë i dizajnuar si fushatë. A po synon zgjedhje të parakohshme VV-ja”, ka thënë ai.
Ndryshe, Kurti ka bërë kërkesë te Kryesia e Kuvendit që nesër të thërret seancë për formimin e Qeverisë më 3 shkurt.