Presidenti serb, Aleksandër Vuçiq ka komentuar deklaratën e mbrëmshme të presidentit Thaçi, i cili tha se e ka ëndërr që Presheva, Medvegja e Bujanoci t’i bashkohen Kosovës.
Vuçiq tha se kjo dëshirë e Thaçit mbetet vetëm ëndërr, teksa u shpreh se nuk dëshiron ta komentoj më gjatë.
“Unë nuk jam mjek, nuk dua ta komentoj. Lëreni të qëndrojë në ëndrrat e tij”, tha Vuçiq në një adresim para mediave serbe, transmeton Reporteri.
Vuçiq komentoi edhe deklaratën e Lutfi Hazirit i cili në një intervistë për Reporterin tha se do të jepte 17 fshatra të Zubin Potokut e Leposaviqit për Preshevën, Medvegjën e Bujanocin.
Vuçiq mohoi se ka pasur ndonjëherë ndonjë ofertë të tillë.
“Askush, kurrë në jetë nuk ma ka thënë këtë, as nuk është e mundur që ju të mendoni në atë mënyrë.
Ato ide janë plotësisht të pakuptimta, 6.5 përqind e shqiptarëve jetojnë në Medvegjë, 425 serbë jetojnë në Bujanoc, unë nuk e kuptoj se për çfarë bëhet fjalë”, u shpreh ai.