Një shofer kosovar me veturën e tij Ferrari, ka arritur shpejtësinë deri në 314 kilometra në orë në autostradën ‘Ibrahim Rugova’
Në Facebook janë publikuar disa video të një veture Ferrari, e cila ka dhënë show në autostradë si dhe në rrugën e garave që gjendet afër pistës së Aeroportit ‘Adem Jashari’.
Shoferi me Ferrari arrin shpejtësinë deri në 314 kilometra në orë, në pjesën ku shpejtësia e lejuar është deri në 130 kilometra në orë.
Pamjet janë publikuar nga vet ai, në një grup në Facebook.
Sipas ligjit për rregullat e trafikut rrugor, Neni 56, thotë se në rrugë jashtë zonës urbane shoferit nuk i lejohet që të lëvizë me mjet me shpejtësi më të madhe sesa është e caktuar me shenjë të trafikut, e më së shumti: 1.1. në autoudhë – njëqind e tridhjetë (130) km/orë; 1.2. në motoudhë – njëqind e dhjetë (110) km/h; 1.3. në rrugë nacionale me dy shirita për një kah me ndarje fizike të shiritave rrugorë – njëqind (100) km/h; 1.4. në rrugë nacionale me një shirit të trafikut për një kah, në rrugë rajonale dhe në rrugë lokale – tetëdhjetë (80) km/h.
Dënohet për kundërvajtje, me gjobë prej dyqind (200) deri në gjashtëqind (600) euro, shoferi i cili jashtë zonës urbane lëviz me mjet mbi pesëdhjetë (50) km/h mbi shpejtësinë e lejuar, të
përcaktuar me rregulla të përgjithshme ose me shenjë të trafikut. Përveç gjobës, atij i shqiptohet masa mbrojtëse ndalim i të drejtuarit të mjetit me veprim motorik në kohëzgjatje prej tre (3) muajsh, si dhe i shqiptohen tri (3) pikë negative. /Metro