Pas deklaratave që ka bërë presidenti Thaçi në drejtim të Familjes së kryetares së Kuvendit, Vjosa Osmani, pos saj, ka reaguar edhe këshilltari Faton Peci.
Ai ka shkruar se i pari i vendi është shndërruar në makineri propagande e shpifjesh, raporton Kosova ime.
Reagimi i plotë i Pecit:
Kur një president i vendit shndërrohet në makineri propagande e shpifjesh, ai më nuk përngjet me këtë post. Ai mbetet vetëm një kusar politik që po ia vjedhë të ardhmen çdo ditë qytetarëve të këtij vendi.
Këtij “presidenti” qyqar e vetmja armë për të qëndruar në skenë i ka mbetur shpifja jo vetëm ndaj kryeparlamentares, por secilit që ia thotë të vërtetën troç. Hashimokracia e ka një fund siç kanë fund edhe shpifjet e njeriut që është shndërruar në patron të Kosovës.
Hashimokracia do ta ketë fundin njësoj sikurse regjimet kësisoj që e dhunojnë jetën e qytetarëve! Kjo përhanie e njeriut që nominalisht njihet si president shpërfaq klimaksin politik që e ka mbërthyer atë.
Hashim, në libra historie je, por historisë sate i ke rënë me vulën e turpit.
Hashim, me të drejtë ke ngatërruar termet “dëshmi” dhe “prokurori”. Për vetëm një javë, ti je i pandehur real për çdo instancë! Hashim, ti mërmërit, karvani ecën!
Ndërkaq, ndaj reagimit të Vjosa Osmanit, një deklaratë e ka bërë këshilltari i presidentit, Adil Behramaj.
Ai ka shkruar se Osmani është shumë e re për të qenë kaq patetike, raporton Kosova ime.
Reagimi i plotë:
Vjosa Osmani është shumë e re për të qenë kaq shumë patetike. Ndonëse është tërësisht e përhumbur si çapkëne politike, ky patetizëm edhe si refren për votuesit e saj të grumbulluar në emër të LDK-së është i skaduar.
Ore e çast punon kundër LDK-së dhe ende ka fytyrë të thirret në emër të saj. Kështu është kur në kolltuqe institucionale ulet soji i saj që as stabilitet emocional nuk ka, se lëre më aftësi për ta udhëhequr atë institucion duke u shtathedhur politikisht!