Arabia Saudite ka vendosur që t’ua përfundojë aktivitetin tetë shkollave turke të lidhura me Ministrinë e Arsimit Kombëtar të Turqisë, të cilat janë duke operuar në kryeqytetin Riad dhe në provinca të tjera. Mbyllja e shkollave do të bëhet në fund të vitit shkollor.
Sipas disa burimeve diplomatike, Ministria e Arsimit e Arabisë Saudite tashmë ua ka dorëzuar vendimin me shkrim shkollave në provincat Tabuk, Riad, Taif dhe Jeddah, shkruan Anadolu.
Zyrtarët sauditë gjithashtu i vizituan shkollat turke në provincat Dammam dhe Abha, për t’i informuar drejtuesit e shkollave rreth këtij vendimi. Pjesë e vendimit për mbyllje do të jenë edhe shkollat turke në qytetet e shenjta për myslimanët, Mekë dhe Medine.
Në vendimin e Ministrisë së Arsimit të Arabisë Saudite thuhet: “Aktivitetet në shkollat turke do të përfundohen në fund të këtij viti akademik. Për nxënësit do të ofrohet lehtësim që të bëhen pjesë e shkollave sipas zgjedhjes së tyre, ndërsa administratat e shkollave duhet t’i informojnë prindërit për vendimin.”
Nga vendimi për mbylljen e tetë shkollave do të preken mbi 2.200 nxënës, thanë burimet diplomatike.