Serbia do të shpenzojë këtë vit gjysmë miliard euro për armatime. Armë moderne, si sistemi anti-tank rus “Kornet” u prezantuan së fundmi nga presidenti i Serbisë.
Ministri serb i Mbrojtjes, Nebojsha Stefanoviq deklaroi se blerjet do të vijojnë pasi sektori i mbrojtjes duhet të përshtatet me aktualitetin.
“Serbia nuk përbën kërcënim për askënd. Ajo po armatoset në bazë të nevojës dinamike për të pasur një ushtri në gjendje të mbrojë vendin”, tha ministri serb i Mbrojtjes, Nebojsha Stefanoviq.
Shumë vende në Ballkan po ndjekin të njëjtin shteg në ripërtëritjen e ushtrive. Eksperti Igor Tabak sqaron se kjo po bëhet në kuadër të kontekstit gjeopolitik.
Edhe Kroacia po gërmon xhepat për të shpenzuar 1.2 miliardë euro për avionë dhe automjete luftarake. Bosnje e Hercegovina dhe Kosova do të shpenzojnë gjithashtu, por jo në këto përmasa. A po përjeton Ballkani një garë armatimi 3 dekada pas Iuftërave?
“Së pari, të gjitha vendet e ish-Jugosllavisë kanë të njëjtin problem, ato e bazojnë armatimin në bazë të shembullit të ushtrisë popullore jugosllave. Koha e ka konfirmuar këtë. Së dyti, konceptet Iuftarake kanë ndryshuar. Një pjesë e pajisjeve janë vjetërsuar”, tha Vlade Raduloviq, Qendra për Kërkime Gjeostrategjike dhe Terr0rizmin.
Një sondazh i fundit i realizuar nga Qendra për Politikat e Sigurisë në Beograd tregon se 40 për qind e qytetarëve serbë mendojnë se ushtria është e pajisur më mirë krahasuar me 10 vjet më parë.
Ndërsa dy të tretat e të pyeturve thonë se për ushtrinë duhen shpenzuar më shumë të ardhura.