Analisti i futbollit, Driton Latifi, tregon detajet gjatë takimit me trajnerin e madh kroat, Mirosllav Çiro Bllazheviq, i cili sot ka ndërruar jetë në moshën 88-vjeçare.
“Një mik i madh i Kosovës sot është larguar nga kjo botë, por kujtimet për të nga koha e artë e Prishtinës e tutje do të mbeten të përjetshme.
Gjatë intervistës me te ne Euro 2004 në Portugali, sa u prezantova se jam gazetar nga Kosova më mori afër vetes duke i urdhëruar tjerëve të më asistojnë çka do që më duhej…
Në bisedë e sipër më tregoi një histori personale që tha kurr nuk do ta harroj në jetë”, ka shkruar Latifi.
“Isha duke udhëtuar me familje me tren në Zvicër dhe gjatë udhëtimit morëm diçka pije e gjëra të lehta ushqimore, kur mora të paguaj djaloshi që na shërbeu më drejtohet me fjalët: zotëri a jeni ju Çiro Bllazheviq? I thashë po, me një buzëqeshje.
Tha kur kam qenë i vogël babai më ka lënë amanet kurdo që të takosh këtë njeri i shërben, kujdesh dhe e ndihmon pa asnjë para, se ky na ka ndihmuar shumë…
Përkundër insistimit tim dhe të familjes ishte e pamundur ta bindnim për pagesë. Kosova ka popullatën më të mirë dhe më fisnike në botë. Si në Prishtinë askund nuk e kam ndje dashurinë dhe afërsinë njerëzore.
Mi përshëndet të gjithë kur të kthehesh”, më kishte thënë Çiro.