Kryetarja e Kuvendit të Kosovës, Vjosa Osmani është kërcënuar përmes rrjetit social Twitter nga një person.
Gazeta Online “Reporteri.net” nga burime brenda Policisë së Kosovës e kanë konfirmuar këtë gjë.
Edhe Policia e Kosovës në raportin e saj 24 orësh ka raportuar për një rast kërcënimi në gjuhen angleze përmes llogarisë të rrjetit social Twiter.
“Kanosje. Sheshi Ibrahim Rugova, Prishtinë, 23.06.2020-16:37. Ankuesi mashkull kosovar, ka raportuar se në llogarinë e rrjetit social Twiter ka ardhur një kërcenim në gjuhën angleze. Lidhur me rastin është njoftuar prokurori”, thuhet në raport.
Burime të Reporteri.net bëjnë me dije se rastin në polici nuk e ka raportuar kryeparlamentarja Osmani, por një nga këshilltarët e saj, andaj edhe në raport të policisë thuhet se ankesa është bërë nga një mashkull.
Reporteri.net ka telefonuar edhe kryeparlamentaren Osmani për të marrë një përgjigje nga ajo nëse është kërcënuar por nuk e ka hapur telefonin.
Deri në këtë moment Osmani nuk e ka kthyer përgjigje as në mesazh në pyetjen që i është dërguar.