Dy mjekëve kinezë, të cilët ishin të sëmurë rëndë nga COVID-19, iu është errësuar ngjyra e lëkurës nga sëmundja.
Dr Yi Fan dhe Dr Hu Weifeng, të dy 42 vjeç, u prekën nga koronavirusi derisa po kuronin pacientë në Spitalin Qendror Wuhan në janar, shkruan Daily Mail, transmeton lajmi.net.
Ndryshimi i ngjyrës, është shkaktuar nga pabarazitë hormonale, pasi mëlçitë e tyre u dëmtuan nga virusi, tha mjeku që po ofronte tretman mjekësor për ta, për mediat shtetërore kineze.
Të dy mjekët u diagnostikuan në 18 janar.
Ata u dërguan së pari në Spitalin Pulmonar Wuhan dhe më pas u transferuan në degën Zhongfa Xincheng të Spitalit Tongji, sipas transmetuesit shtetëror kinez CCTV.
Dr Yi, kardiolog, mundi COVID-19 pasi mjekët e lidhën atë në një makinë mbështetëse e quajtur ECMO për 39 ditë.
Gjendja e Dr Hu është më e rëndë.
Urologu ka qëndruar në shtrat për 99 ditë dhe shëndeti i tij i përgjithshëm është i dobët, tha Dr Li Shusheng i cili trajtoi Dr Hu.
Ai është ende duke u kujdesur në njësinë e kujdesit intensiv në të njëjtin spital me Dr Yi.