Kryeministri i Kosovës, Avdullah Hoti, të enjten ka emëruar disa zëvendësministra, e në mesin e tyre edhe nje person që muaj më parë ka kërcënuar një punëtor parkingu me armë zjarri, shkruan Gazeta Metro.
Kryeministri Hoti të enjten ka emëruar gjithsej 22 zëvendësministra, që vijnë kryesisht nga Nisma, komunitetet dhe nga radhët e LDK’së.
Mirëpo, jo të gjithë këta zëvendësministra janë pa probleme me ligjin.
Është Yildiray Bayram, i cili u emërua zëvendësministër në Ministrinë e Punëve të Brendshme nga radhët e minoritetit turk, e që nuk po del të jetë i pastër nga drejtësia e Kosovës.
Gazeta Metro mëson se Yildiary Bayram, gjatë punës së tij si zyrtar i Doganës se Kosovës kishte kërcënuar me armë zjarri një punëtor në parkingun prapa Pallatit të Rinisë natën e 25 dhjetorit te vitit 2018, kur Dogana kishte organizuar ndejën e fundvitit për punëtorë.
Ish-zyrtari i Doganave të Kosovës Bayrami, tash i emruar zëvendësministër në Ministrinë e Punëve të Brendshme nga Hoti, kishte qenë në gjendje të dehur kur kishte kanosur me armë punëtorin e parkingut prapa Patllatit të Rinisë në dhjetorin e vitit 2018.
Ndërsa, atë natë njësitë policore të stacionit Qendra e kishin shoqëruar të dyshuarin në stacion. Atij i ishte konfiskuar arma me të cilën dyshohet se ëshë kryer kanosja.
Derisa Bayram ishte suspenduar menjeherë nga pozita e tij në Doganat e Kosovës, këtë e ka konfirmuar zëdhënësi i Doganave të Republikës së Kosovës, Adriatik Stavileci për Gazetën Metro.
“Lidhur me pyetjen tuaj ju njoftojmë se, zyrtari Ylldiry Bayram është i suspenduar me vendimin e datës 27.12.2018 ( vendimi nr.protokoli 01/560/2018) pasi qe ndaj zyrtarit ka filluar procedura penale nga Policia e Kosovës, për veprën penale “Kanosje dhe ngasje nën ndikim te alkoolit”. Lidhur me procedurën penale përkatësisht epilogun e këtij rasti deri me tani Dogana e Kosovës nuk ka pranuar ndonjë informate zyrtare nga Gjykata Themelore Prishtine. Ndërsa lidhur me shkeljen e Kodit të Kodit të Mirësjelljes përkatësisht shkeljen ( nga pika 16 e Aneksit 1 kategoria 2 te UA 16/2016 Për Procedurë Disiplinorë ) Manipulim i pakujdesshëm me mjete mbrojtëse apo armë, qe nuk është me pajtueshmëri me procedurat, me rrezik për dëmtim trupor te vetes apo të tjerëve, Dogana e Kosovës ka kryer procedurën disiplinore, me ç’rast Komisioni Disiplinor me vendimin me nr. prot 06/15568 datë 06.11.2019 konform nenit 5, paragrafi b, e Udhëzimit Administrativ për Procedure Disiplinore nr. 16/2015, ndaj zyrtarit në fjalë ka shqiptuar masën disiplinore : · “degradim nga pozita OD 2 , në pozitën OD1 duke përfshirë edhe transferim në një pozite tjetër dhe pa të drejte ri-konkurrimi për avancim në kohëzgjatje prej dy (2) viteve “, Vendim ky i ratifikuar me vendimin me nr. prot. 1302/1 19.12.2019. me datë 19.06.2020 zyrtari Yldiray Bayram ka bëre kërkese për Pezullimin e përkohshëm të të drejtave dhe detyrave nga marrëdhënia së punës, bazuar në nenin 41 pika 1.2 e Ligjit të Punës 03/L-212 , me rastin e emërimit si Zëvendës Ministër i Punëve të Brendshme, kërkese kjo e cila nuk është shqyrtuar ende nga Drejtori i Përgjithshëm .”,tha ai.
Nysret Azemi, deshmitari i rastit edhe pasi që kishin kaluar tetë muaj, siç thotë ai në klank, nuk ishte marrë fare në pyetje nga prokuroria e rastit por vetëm nga policia.
I kontaktuar nga Gazeta Metro, ai ka thënë se nuk është fare në dijeni se çfarë ka ndodhur me rastin.
Ndërsa ende nuk dihet se cili është verdikti i kësaj ngjarje që mund të kishte përfundim tragjik.
E rastin e kishte marrë përsipër prokurorja Merita Lumezi. E kontaktuara nga Gazeta Metro, prokurorja Lumezi nuk ka qene e qasshme.
Vlen të theksohet se Lidhja Demokratike e Kosovës, me të marrë drejtimin e qeverisë, kishte thënë se në marrëveshjet me partnerët e koalicionit kanë pasur ujdi që në kabinetin qeveritar të mos kenë persona që kanë probleme me ligjin.
Ndërsa nuk dihet ende se a do të marrë ndonjë veprim kryeministri Hoti në lidhje me rastin në fjalë
