Presidentja e vendit, Vjosa Osmani, i ka quajtur shpikje raportimet e mediave serbe se Kosova po furnizohet me armë nga Britania e Madhe.

“Tema që Kosova po militarizohet nga të tjerët është temë që ata e shpikin në mënyrë që të ndryshojë narrativat se kinse të gjithë po e bëjnë. Ne tash kemi partneritet me shtetet tjera”, tha Osmani.

Presidentja Osmani në një intervistë në emisionin “Kallxo Përnime” ka thënë se Kosova është në koordinim me partnerët për ta furnizuar me armë Forcën e Sigurisë së Kosovës (FSK).

“Ne nuk kemi marrë armë në kontekstin që po e thotë Vuçiq, por ne jemi partnerë me SHBA-në dhe anëtarët e tjerë të NATO-s, në mënyrë që ta furnizojmë ushtrinë tonë, me mjetet që ka nevojë”, tha ajo.

Sipas saj, kjo fushatë e Serbisë po bëhet për ta fshehur faktin që ajo po furnizohet me armatim nga Kina.“Fushata e Serbisë kundër Kosovës dhe kundër partnerëve të Kosovës, gjithmonë vjen në momente kur ata tentojnë me fshehë diçka.

Kjo ka filluar nga armatosja shqetësuese që po e bënë Serbia këto ditë sidomos, por ka ndodhur me muaj të tërë dhe siç e dini, Serbia partnerë në aspektin ushtarak e ka Rusinë dhe Kinën”, theksoi presidentja.

Mediat në Serbi ditëve të fundit kanë raportuar se Kosova është duke u furnizuar me armatim nga Britania e Madhe.

Kryeministri i vendit, Albin Kurti në një deklaratë ka thënë se raportimet e mediave serbe nuk duhet të merren si fakte.