Një fotografi e ushqimit që iu shërbye policëve të Njësisë Speciale të Kosovës të cilët po qëndrojnë në Veri për të mbikëqyrur situatën pas vendosjes së reciprocitetit për targat e veturave që vijnë nga Serbia, nxiti reagime të shumta në rrjete sociale.
Por, përveç reagimeve, nxiti edhe vullnetin e qytetarëve për t’iu dërguar ushqim e pije pjesëtarëve të Njësisë Speciale të Policisë së Kosovës.
Pronari i një mishtoreje në Gjilan, të martën ka dërguar shujta me ushqim për policët.
Në një lidhje direkte për emisionin #Gjesi në T7, Valtoni ka treguar se si erdhi deri te ideja për dërgimin e ushqimit dhe çka përgatiti për policët.
Ai ka treguar se është në pritje të përgjigjes nga Policia e Kosovës, për t’iu dërguar ushqim çdo ditë pjesëtarëve të Njësisë Speciale që po qëndrojnë në Veri.
“Unë jam i gatshëm çdo ditë të ua dërgoj nga një shujtë, jam në pritje të përgjigjes sot të më lajmërojnë, jam i gatshëm t’i ndihmoj Policisë së Kosovës me gjërat që kam mundësi”, ka deklaruar Valtoni.
Ndiqeni intervistën e plotë në #Gjesi, të pronarit të mishtorespër të mësuar se cilat ishin ushqimet që ai i përgatiti për policët dhe se si u dërguan ato në Veri.