Analisti dhe gazetari, Valon Syla ka komentuar reagimin e Ministrisë së Punëve të Jashtme të Kosovës që sot doli në mbrojtje të Izraelit, shumë ditë pasi gjithë forcat politike globale reaguan njëjtë, shkruan Gazeta Metro.
Syla në postimin e tij thotë se Kosova ka reaguar vonë dhe se ‘diplomacia e gërrnaçave’ po e përfaqëson Kosovën brenda.
“Veç edhe 1 mangësi e patëm. Mu bo me Palestinë. Hajt, se ja ndini krismëm. Izraeli ju falënderu miqve të vet, por Kosovës, jo. Vonë reagoi diplomacia e gërrnaçave, që fatkeqësisht po e përfaqëson Kosovën brenda”, shkroi Syla.
Ministria e Punëve të Jashtme e Kosovës, sot përmes një postimi në Twitter deklaroi se si çdo shtet, edhe Izraeli ka të drejtën dhe detyrimin për ta mbrojtur popullin e vetë kundër raketave nga Hamasi.
“Si çdo shtet, edhe Izraeli ka të drejtën dhe obligimin për ta mbrojtur popullin e tij kundër 2000 raketave të hedhura mbi civilët vetëm nga Hamasi, i cili po mban peng civilët palestinezë në luftën e tij. Ne jemi të pikëlluar për të gjitha viktimat. Ne kërkojmë që të përmbahemi, ta ndalojmë dhunën dhe të kërkojmë zgjidhje paqësore”, thuhet në deklaratën e kësaj ministrie.