Vjosa Osmani, nga momenti që është nominuar zyrtarisht nga LDK-ja për kryeministre të Kosovës e ka nisur fushatën me një fjalor të ashpër ndaj rivalëve politik e duke bërë premtime të mëdha, se si do ta “çkapë shtetin”.
Ajo edhe të mërkurën gjatë vizitës në qytetin e Vitisë foli se si do t’ia kthej “shtetin e kapur” qytetarëve.
“Ky vend, ky shtet, kjo Republikë, është e qytetarëve dhe pikë. Është detyrë e imja, është detyrë e LDK-së, që shtetin e kapur nga partitë e pushtetit, t’ua kthejmë juve qytetarëve, përfundimisht! Dhe s’ka gjë që na ndalë në këtë rrugëtim”, mesazhi i kandidates së LDK-së për kryeministre”, deklaroi ajo.
Osmani ndërkaq në një intervistë për ‘Zërin e Amerikës’, ka akuzuar ish-qeverinë e PAN-it me partnerët tjerë, “se kanë dëshmuar që nuk kanë mentalitet qeverisës se zhvillimor, por kanë mentalitet plaçkitës”.
Por të gjitha këto deklarata të Osmanit për një shtet më të mirë nën udhëheqjen e LDK-së, i demantoi hiç më larg se të mërkurën ish-deputeti i këtij subjekti dhe njëri nga figurat kryesore të kësaj partie, Naser Osmani, i cili u përplas me prokurorin në gjykimin për “3 përqindëshin”, ku tregoi ‘muskujt’ fare pa qenë në pushtet ndaj njerëzve të drejtësisë, shkruan Reporteri.net.
Me të përfunduar seanca, i akuzuari në këtë rast Naser Osmani, i është ofruar prokurorit Atdhe Dema duke i thënë se e gjitha ndaj tij po bëhet me porosi.
Derisa prokurori i ka kërkuar që të largohet me arsyetimin se atij nuk i lejohet një komunikim i tillë, ndërsa i ka kërkuar avokatit Arianit Koci që ta kontrollojë klientin e tij.
Kjo sjellje e Naser Osmanit ndaj prokurorit padyshim se mund të cilësohet si lloj presioni dhe në të njëjtën kohë shtron dilemën e fortë se sa mund ta “çkapë shtetin” Vjosa Osmani si kryeministre eventuale e vendit.
Kujtojmë se ih-deputeti i LDK-së, Naser Osmani dhe Atdhe Gashi, që ishte këshilltar i kryeministrit në ekzil Bujar Bukoshit, po akuzohen për shmangie nga tatimi dhe për shpërdorim në rastin që njihet ndryshe si Fondi i 3-shit.
Pjesë e kësaj aktakuze ishte edhe Bujar Bukoshi, por për shkak të gjendjes shëndetësore, procedura ndaj tij është veçuar.