I dërguari i Shteteve të Bashkuara të Amerikës për dialogun Kosovë-Serbi, Richard Grenell u takua të hënën në Uashington me presidentin kosovar, Hashim Thaçi dhe atë serb, Aleksandar Vuçiq.
Nga ky takim nuk u dhanë edhe aq shumë detaje se çfarë u diskutua. Presidenti Thaçi kërkoi që gjatë javës të raportojë në Kuvend për takimet që ka pasur në SHBA, ndërkohë theksoi se do të ketë risi.
Përkundër Thaçit, presidenti serb, Aleksandar Vuçiq tha se Serbia është e gatshme të rikthehet në dialog nëse Kosova heq tarifat.
Theks të veçantë pati deklarata e tij kur tha se Shtetet e Bashkuara nuk kanë kërkuar ndonjë lëshim nga Serbia në këmbim të heqjes së tarifës nga Kosova.
Për këtë çështje lajmi.net ka kontaktuar zyrën e Grenellit në Gjermani. Zëdhënësi i tij, Dick Custin ka thënë se nuk ka detaje për takimin e zhvilluar në Uashington, por na ka porositur t’i përcjellim postimet e Grenell në Twitter.
“Unë nuk kam asnjë detaj tani, por do të t’ju rekomandoja të vazhdoni të shikoni njoftimet e ambasadorit Grenell në Twitter dhe Këshillit të Sigurisë Kombëtare”, ka thënë Custin.
Po ashtu, ai ka përcjellur edhe deklaratën e dhënë të Sekretarit të Shtetit, Mike Pompeo pas takimit me Vuçiqin.
Në këtë deklaratë kuptohet qartë se SHBA-të nuk i kanë kërkuar Serbisë asgjë në favor të heqjes së taksës. Aty thuhet se Pompeo ka inkurajuar Vuçiqin të nis zbatimin e marrëveshjeve të arritura në Berlin.
“Sekretari i Shtetit Mike Pompeo u takua me presidentin serb, Aleksandar Vuçiq më 2 mars në Uashington. Pompeo përsëriti mbështetjen e SHBA-ve për Serbinë dhe qëllimin e saj për anëtarësim në BE. Sekretari theksoi rëndësinë e kthimit në negociata me Kosovën dhe normalizimin e marrëdhënieve. Pompeo gjithashtu inkurajoi presidentin Vuçiq të nis zbatimin e marrëveshjeve për linjën ajrore, hekurudhore dhe autostradën në mes Prishtinës dhe Beogradit. Sekretari Pompeo dhe Vuçiq diskutuan për zhvillimin e vazhdueshëm të Serbisë si një komb modern, demokratik dhe i përkushtuar në paqe me fqinjët e saj”.
Ndërkohë, Vuçiq nga Uashingtoni deklaroi se Serbia nuk do ndalet së lobuari kundër Kosovës dhe se do të ketë tërheqje të reja të njohjeve, duke e bërë kështu të qartë se nuk do e ndalin lobimin kundër edhe nëse taksa hiqet.
Sa i përket çështjes së taksës, spektri politik në Kosovë vazhdon të ketë dallime. Një pjesë e opozitës kërkon pezullim për 120 ditë, tjetra që taksa të mos hiqet , ndërsa nga koalicioni qeverisës, LDK është pro heqjes së plotë të taksës, ndërsa Vetëvendosje po kërkon heqje të pjesshme dhe vendosje të reciprocitetit.