Raportuesja për Kosovën në Parlamentin Evropian, Viola von Cramon, ka thënë se BE-ja duhet të fillojë t’ia tregojë dhëmbët Rusisë pas provokimeve të saj me forca ushtarake në kufirin me Ukrainën.
“Rusia duke e provokuar Ukrainën me 100 mijë trupa. BE-ja dhe aleatët duhet të fillojnë t’ia tregojnë dhëmbët dhe të vënë sanksione strikte. Ta praktikojmë atë që e predikojmë dhe t’i dëshmojmë Rusisë se në botën e ligjit ndërkombëtar, fuqia nuk e bën të drejtën. Qëndrojmë për Ukrainën”, ka shkruar Von Cramon.
Autoritetet ukrainase thanë se Rusia ka lënë disa njësi ushtarake afër kufirit me Ukrainën edhe pas ushtrimeve dhe se numri i përgjithshëm i trupave ruse në zonë është 90.000.
Forcat e armatosura ruse zhvilluan një varg ushtrimesh gjatë pjesës së dytë të vitit, përfshirë trupat që lëshohen nga ajri, tha Ministria e Mbrojtjes e Ukrainës.
Pas ushtrimeve, njësitë e Armatës së 41-të mbetën në pjesën evropiane të Rusisë në një largësi prej rreth 260 kilometrash nga kufiri me Ukrainën, shkruan Reuters, transmeton Gazeta Express.
“Duhet të theksohet se Federata Ruse në mënyrë të kohëpaskohshme i është kthyer praktikës së transferimit dhe grumbullimit të njësive ushtarake me qëllim të mbajtjes së tensioneve në rajon dhe trysnisë politike ndaj shteteve fqinje”, tha Ministria e Mbrojtjes e Ukrainës.
Sidoqoftë, kjo ministri të hënën mohoi një raportim të medieve se Rusia është duke e shtuar praninë e trupave në kufi, duke thënë se nuk ka vërejtur rritje të forcave apo armatimit.
Në pranverën e këtij viti, Rusia i alarmoi kryeqytetet evropiane dhe Kievin duke grumbulluar mbi 100.000 trupa përgjatë kufirit me Ukrainën, ndonëse më vonë i ktheu në bazën e tyre.
Marrëdhëniet mes Kievit dhe Moskës janë përkeqësuar që nga viti 2014, kur Rusia e aneksoi Gadishullin e Krimesë nga Ukraina dhe kur shpërtheu lufta mes forcave qeveritare ukrainase e separatistëve të përkrahur nga Rusia në pjesën lindore të Ukrainës. Sipas Ukrainës, në këtë luftë janë vrarë rreth 14.000 njerëz.
🇷🇺#Russia bullying 🇺🇦#Ukraine with >100K troops: the #EU & allies need to start showing teeth & impose the strictest sanctions.
❗Let’s practice what we preach & prove Russia that in the world of international law, might does not make right. Stand up for Ukraine!
👇My speech👇 pic.twitter.com/y053uBTiKU— Viola von Cramon (@ViolavonCramon) December 15, 2021