Nëse zgjedhjet e përgjithshme nacionale do të mbaheshin këtë të diel, 62.6% e qytetarëve kanë gatishmëri për të dalë në zgjedhje.
Kështu janë përgjigjur qytetarët në hulumtimin e opinionit publik të kryer nga UBO Consulting për T7.
Rezultatet e këtij hulumtimi ekskluziv, po shpalosen në emisionin Presisng.
Megjithatë, ndryshe nga 14 shkurti i vitit 2021, kur në zgjedhjet nacionale Lëvizja Vetëvendosje, bashkë me Listën Guxo, shënuan fitore bindëse duke marrë mbi 50% të votave të përgjithshme, vullneti i qytetarëve tani duket më i balancuar.
Në “nëse zgjedhjet parlamentare do të mbaheshin këtë të diel, për cilin subjekt politik do të votonit?”, qytetarët, me votë të deklaruar, janë përgjigjur si vijon:
Lëvizja Vetëvendosje – 41.9%
Partia Demokratike e Kosovës – 21.6%
Lidhja Demokratike e Kosovës – 19.4%
Aleanca për Ardhmërinë e Kosovës – 7.2%
Lista Guxo – 1.1%
Nisma Social Demokrate – 1%
Aleanca Kosova e Re – 0.5%
Partia Socialdemokrate – 0.3%
Sipas këtij rezultati të hulumtimit, del se nëse zgjedhjet do të mbaheshin këtë të diel, VV dhe Lista Guxo, së bashku do të merrnin 43% të votave të përgjithshme.
Do të ndryshonte edhe përbërja në Kuvendin e Kosovës, ku në mesin e pesë partive parlametnare, VV do t’i merrte 46 ulëse, PDK 24, LDK 22 dhe AAK 8.
Metodologjia e aplikuar në këtë hulumtim, është bërë me përzgjedhjen e amvisërisë duke shfrytëzuar metodën sistematike të rastësisë, si dhe zhvillimin e anketës me personin i cili e ka ditëlindjen e parë më të afërt i moshës mbi 18 vjet.
Për hulumtimin e kryer, lista votuese e KQZ-së e vitit 2021 ka shërbyer si kornizë për ndërtimin e mostrës, ndërkaq mostra n=1065 e dizajnuar për sigurimin e mostrës përfaqësuese, e shtresuar sipas etniciteteve: shqiptar, serb dhe minoritete jo-serbe. Minoritetet e mbi-përfaqësuara në anketim, mostra e peshuar për analizë.
Gjinia e të anketuarve është 50.3% meshkuj dhe 49.7% femra, ndërkaq shtrirja sipas vendbanimeve urban 42.8% dhe 57.2% rural. Margjina e gabimit ±3 pikë të përqindjes në përzgjedhje për interval të konfidencës 95%. Periudha e anketimit është mes 07 dhe 15 marsit 2022.