Ka vazhduar edhe sot largimi i serbëve nga institucionet e Kosovës. 11 pjesëtarë nga komuniteti serb janë larguar sot nga Dogana e Kosovës.
Zëdhënësi i Doganës, Adriatik Stavileci ka thënë se jo të gjithë të dorëhequrit kanë qenë doganierë, por kanë punuar për doganën.
- Advertisement -
“Po janë larguar 11 pjesëtarë. Jo të gjithë kanë qenë doganierë, por kanë punuar për Doganën. Bëhet fjalë për nëntë serbë dhe dy boshnjakë”, ka thënë Stavilevci për Reporteri.net.
Më 5 nëntor, Lista Serbe mori vendim për largim nga të gjitha institucionet e Kosovës. Ata po kërkojnë nisjen e bisedimeve për themelimin e Asociacionit dhe tërheqjen e vendimit për targa.
Kryeministri Kurti gjatë ditës së djeshme në një deklarim për media u ka bërë thirrje serbëve që të mos bojkotojnë institucionet e vendit duke shtuar se Qeveria që ai drejton synon vetëm zbatimin e sundimit të ligjit.